UA-64077478-1

Ok

En poursuivant votre navigation sur ce site, vous acceptez l'utilisation de cookies. Ces derniers assurent le bon fonctionnement de nos services. En savoir plus.

  • LA GRÈCIA PRESENTA O ABSENTA - LA GRÈCE PRÉSENTE OU ABSENTE

    La Grècia presenta o absenta ?

     

    La Grècia qu’ei, com ac sabetz, de mòda. Faiçon de parlar, solide. L’actualitat dramatica d’aqueth país que neureish la sonsaina quasi quotidiana qui’ns balhan a escotar los mèdias. Adara qu’ei de mau suportar. Que m’avisi de que tot çò qui hasè l’encantament d’aqueth país, la soa istòria, la soa civilizacion lusenta qui neurí la de l’Euròpa e deu monde sancer, qu’estó esfaçat en plen tanlèu començada la crisi anonciada. Non parlarèi pas ací deu malastre deu pòble grèc e deu noste Alèxis, adara coneishut capvath lo monde sancer. Non, que trobèi en çò d’un boquinista bordalés cinc vielhs numèros de la revista Letras d’Òc, qui d’autes còps èra un suplement literari deus Quasèrns pedagogics de l’I.E.O. Lo n° 26, deu quatau trimèstre de 1964, que bota a la soa taula un poèma de Robèrt Lafont, titolat : Grècia absenta. E òc, a bèths còps, l’azard que’s cara. Com ac escrivó Mallarmé : « Un coup de dé jamais n’abolira le hasard ! ».

     

    La Grèce, comme vous le savez, est à la mode.

     

     

    Grècia absenta

     

    Lei colonas

    flambejan de silenci.

    Lo silenci

    benlèu Foibòs d’antan o sabiá pas.

    Nosautres se’n sarram

    embornhats d’oblit.

     

    Nauplio de nuech

     

    I a dedins l’èr tala doçor pebrada

    que podriatz en clugant vos rebastir lo pòrt

    e l’èr que mieg lusís. Coma s’i foguessiatz…

    I siatz e la vertat pren mina d’allusion.

     

    Flambor a Delfi

     

    I a tant de vida la tantossada

    a la crotz dau soleu.

    Tant de vida que se destibla

    au tast

    de nòstre sang.

    Siam nòstre crist

    per tornar viure

    ont sabèm pas.

     

    Castalia

     

    De còps es lo poèta

    recorregut d’estròfas lòngas

    d’aiga sota platanas.

    La lausa

    es inutila

    senon per l’aiga venguda

    de luenh subre Parnàs

    amont.

     

    Casco d’oplita a Corint

     

    Es bèu.

    La lum bèla

    i viu dedins coma una idèa.

    L’idèa pasmens es luenh d’aicí dins un poèma

    de glòria que sabon de tèsta leis enfants

    sens casco

    sens lum.

     

    Camin

     

    Manjada de passat e maigra de present

    aquesta terra paura d’èstre

    es pas aicí

    ni mai enluòc

    Flamba

    Ren que dins nòstre agach.

    E sabèm caminar qu’a l’agach.

     

    Frejau

     

    Miugrana seca

    dins la mar

    sens peu ni temptacion

    d’agradança.

    Non se pòt mai

    tant esquichada

    cencha d’atòms

    a la preséncia.

     

    Robèrt Lafont (1961)